Dɛsaʋn 'a ‑kwɛɛa' 'bleɛ 'mʋa‑
32
Dafi 'a nyʋ 'snɩ ‑tu" wlu‑.
Nyɔ ‑ɔɔ dɛsaʋn Tʋ "bo 'bɔa ke,
nyɔ ‑ɔɔ dɛsaʋn 'a ‑kɔ ɛ 'wlʋa "kpei ɛ, ɔ nʋ 'mʋa‑.
2 Nyɔ Tʋ "bo sea "jrii nyniidɩ "jru ‑sro' ɛ,
‑ɔɔ nyiɔ tu ‑topin di pɛe sea 'e 'ʋn nɩɛ, ‑mɔ nʋ 'mʋa‑ ‑ke.
3 ‑Ta 'ɩn "mua a 'ma dɛsaʋn wɔn 'de ɛ,
‑mɛ 'ma 'kpɩ ‑wee'‑ a ‑sea' "i. ‑Bo ‑sɔn' ‑sɩn' 'sʋ, 'ma ‑fɩn" ɛ 'dii.
4 Dɛ ‑nʋɛ+, "maʋ o 'jrʋ ‑gbao o ɛ,
'ma ku ‑wee'‑ a "joo ka ‑fʋʋɔ ɔ jiia nyʋ 'ʋn ɛ. ‑Te' ‑kwlʋ.
5 Tʋ "bo, 'ɩn 'tmʋʋ ɛ 'ma dɛsaʋn 'mɛ,
'ɩn se "jriinyni dɛjrɛ' i ‑tu" 'de ɛ ‑pee.
'Ɩn wlu' ka 'ɩn 'na:
Dɩ "klein 'ɩn ‑siai", 'ɩn 'kɔɔa,
'ma muɛ ɩ ‑wee'‑ "i 'wɔɔn 'a.
'Ɩn 'da kan' 'sʋ ɛ ‑sa 'ʋn 'ma dɛsaʋn 'a ‑gbɛ "jru. ‑Te' ‑kwlʋ
6 'Kamɔ tɔ' 'dinyʋ 'jeɛ bae‑,
‑ta nɔ" sea ‑si' ke ɛ,
‑mɛ ‑bo "ni "ji ɛ wa ‑gba mɔ 'de ɛ, ɛ se ɔ i 'tʋn i.
7 Tʋ "bo, ɛmɛ 'ma 'wlaa "jru ‑sɔn
'de ɛ 'je 'ʋn nai" ‑tɩ o tɛɛn‑
'de 'ma ‑seie dʋ 'a 'sʋ 'je 'saan 'dei poo‑. ‑Te' ‑kwlʋ.
8 Ɛ 'na 'ma muɛ ‑ʋn dɛ tɔɔa', 'ɩn 'je ‑ʋn je o po,
'ɩn 'je ‑ʋn 'snɩ ‑tu", 'ɩn 'je ‑ʋn "jriɛ o sie.
9 Ao 'bo "jru kuɛ ka soo" ke soofae' nɩa.
Nyɔ ɔ poɩ ‑kapeɛ' wɔn,
ɔɔ saan ɩa' wɔn "dbi i ‑wɛe ɩa 'je nyʋ wɔn.
10 'Diwɔnynii a 'jeɛ 'kle ‑tuu" ‑tuu
'kaa nyɔ ‑ɔɔ ‑tea' ɔɔ' ‑cɛ" Tʋ "bo 'kwa a,
ɛɛ pooɛ 'dɔe 'a ‑gblo" 'dei.
11 Tɔ' 'dinyʋ, ao nʋʋ Tʋ "bo 'mʋa‑ i,
ao ‑saa 'mʋa‑ ‑cnuɛn", aomɔ ‑ɔɔ pɛe "srɛi i ɛ.